Lugo acolle mañá unha nova edición do certame de pintura rápida ao aire libre
![certame pintura ao aire libre lugo portda](https://lugoxa.com/wp-content/uploads/2023/07/certame-pintura-ao-aire-libre-lugo-portda.jpg)
A Concellería de Cultura anunciou a convocatoria da 23ª edición do certame de pintura rápida ao aire libre Cidade de Lugo, que este ano se celebrará mañá domingo 9 de xullo. No certame poderán participar todas as artistas maiores de 18 anos que o desexen, presentando unha única obra, que non se poderá asinar ata o momento no que se coñeza o ditame do xurado, que estará composto por profesionais das artes plásticas.
O estilo e a técnica serán libres e a súa temática xirará sobre a cidade de Lugo en toda a súa extensión.
As inscricións realizaranse o día do certame, no momento de selado do soporte, entre as 09:00 e as 11:00 horas nas oficinas da área de Cultura para ser selado. As obras presentaranse entre as 16:00 e as 17:00 horas na Praza Maior, onde se coñecerá o ditame do xurado ás 18:00 horas. A partir dese momento, e ata as 20:00, farase unha exposición con todas as obras. Ao remate, as autoras e autores non premiadas poderán facerse cargo das súas obras.
O importe total dos premios é duns 5.550 euros distribuídos deste xeito: un primeiro premio dotado con 1.600 euros, un segundo con 1.100 e un terceiro, con 900. A maiores entregaranse 5 accésits de 300 euros e un premio especial ao artista local, nacido ou residente en Lugo, de 450 euros. Ademais todas as persoas galardoadas recibirán un diploma acreditativo.
![certame pintura ao aire libre lugo](https://lugoxa.com/wp-content/uploads/thumbs/2023/07/certame-pintura-ao-aire-libre-lugo-200x250.jpg)