Lugo acolle unha xornada sobre os retos da xustiza, a discapacidade e a innovación inclusiva
A relación entre xustiza, igualdade e inclusión centrará a quinta edición das Xornadas Xustiza e Diversidade, que terá lugar o xoves 22 de outubro, ás 18.00 horas, no salón de actos de O Vello Cárcere de Lugo.
O programa abordará dous ámbitos de especial relevancia social: a violencia de xénero en relación coa discapacidade e as posibilidades que ofrecen a intelixencia artificial, a robótica e a domótica para favorecer a autonomía e mellorar a calidade de vida das persoas.
A primeira intervención correrá a cargo de Roberto Barba Alvedro, maxistrado e actual director xeral de Loita contra a Violencia de Xénero, que analizará a relación entre a violencia machista e a discapacidade.
A continuación, Sonia Valladares Rodríguez, profesora da Universidade de Santiago de Compostela na área de Ciencia da Computación e Intelixencia Artificial, afondará nas aplicacións da intelixencia artificial, a robótica e a domótica no ámbito social.
O encontro busca abrir un espazo de reflexión e intercambio de ideas sobre como avanzar cara a unha sociedade máis accesible e igualitaria, así como sobre o papel da xustiza e dos avances tecnolóxicos na eliminación de barreiras e na atención ás necesidades dos distintos colectivos.
As xornadas desenvolveranse en O Vello Cárcere, situado na praza da Constitución de Lugo, e están abertas á reflexión sobre os desafíos actuais en materia de diversidade e inclusión.