Lugo acollerá a 36ª edición das Xornadas Luis Asorey, centradas no sector forestal
A 36ª edición das Xornadas Luis Asorey celebrarase entre o 17 e o 27 de novembro no Salón de Actos do Pazo de San Marcos e incluirá sete conferencias que abordarán os retos, as fortalezas e as debilidades do sector forestal galego.
O presidente da Deputación de Lugo, José Tomé Roca, e o presidente da Real Academia Galega de Ciencias, Juan Manuel Leda Rodicio, asinaban un acordo de colaboración polo que a institución provincial achega 5.000 euros á organización das xornadas.
Tomé destacou a traxectoria da RAGC, que leva case 50 anos promovendo a investigación, o estudo e a divulgación das ciencias, e resaltou a relevancia de analizar o sector forestal cun contexto crítico, marcado por unha vaga de incendios que ameaza o patrimonio natural, a seguridade da poboación e o futuro económico das zonas rurais.
Como en edicións anteriores, a asistencia será gratuíta, aínda que require inscrición previa a través da Real Academia Galega de Ciencias.
O programa incluirá conferencias sobre a elección de especies para repoboación forestal, sanidade forestal, silvicultura do carballo, valorización da madeira de frondosas, o mercado das frondosas en Galicia e Europa, oportunidades do asociacionismo para unha xestión sostible dos montes e estratexias para o fomento da xestión activa das masas de frondosas.