Lugo acollerá as II Xornadas Pedagóxicas de Arqueoloxía Lucense
Lugo acollerá este mes de novembro as II Xornadas Pedagóxicas de Arqueoloxía Lucense, unha iniciativa que reunirá especialistas para afondar no patrimonio arqueolóxico da provincia e achegar ao público diferentes investigacións e proxectos de conservación. As sesións celebraranse os días 12, 18 e 25 de novembro, en horario de 18:00 a 21:00 horas, no auditorio do centro cultural O Vello Cárcere.
A primeira xornada, prevista para o 12 de novembro, estará dedicada ao mundo dos castros. Tras a inauguración oficial, ás 18:15 horas Yolanda Álvarez González e Luis Francisco López González, arqueólogos directores de Terra Arqueos, ofrecerán a conferencia 'Campañas de escavación e posta en valor no castro de Castromaior (Portomarín)'. A continuación, de 19:15 a 20:15 horas, Álvaro Pérez Rozas, arqueólogo profesional, e Diego Torres Iglesias, director do Museo do Castro de Viladonga, abordarán as 'Novas liñas de traballo' no castro de Viladonga, en Castro de Rei. A sesión rematará cun pequeno petisco.
A segunda cita terá lugar o 18 de novembro baixo o título 'As orixes da Ribeira Sacra'. Ás 18:00 horas presentarase a xornada e, quince minutos despois, Xurxo Ayán Vila, director do proxecto arqueolóxico do Preguntoiro, falará sobre 'O Preguntoiro (Pombeiro, Pantón): un lugar de memoria con moitas preguntas'. De 19:15 a 20:15 horas, Sonia García Rodríguez, arqueóloga técnica na Unidade de Valorización do INCIPIT-CSIC, ofrecerá a conferencia 'A Cova do Cotillón (Pantón): as pegadas do pasado e os retos da súa conservación'. A programación concluirá tamén cun pequeno petisco.
A terceira e última xornada, o 25 de novembro, centrarase na muralla romana de Lugo. A primeira intervención correrá a cargo de Celso Rodríguez Cao, arqueólogo profesional, que presentará os resultados das 'Investigacións arqueolóxicas na muralla romana de Lugo, 2020-2026', entre as 18:15 e as 19:15 horas. Posteriormente, José Ignacio López de Rego Uriarte, arquitecto redactor do Plan de Conservación e Xestión da Muralla Romana de Lugo, explicará os 'Avances no desenvolvemento do Plan de Conservación e Xestión da Muralla Romana de Lugo'. A sesión finalizará cun petisco entre as 20:15 e as 21:00 horas.
As xornadas están promovidas pola Xunta de Galicia, a través da Consellería de Cultura, Lingua e Xuventude, e enmárcanse na programación do Xacobeo 2027.