Lugo acollerá este sábado unha nova cita do Campionato Galego de Motocross no circuíto Jorge Prado
O Circuíto Municipal Jorge Prado de Lugo será escenario este sábado 30 de maio dunha nova proba do Campionato Galego de Motocross, que se disputará de maneira conxunta co Campionato Asturiano da especialidade. A competición reunirá arredor de 80 pilotos distribuídos en 11 categorías diferentes nunha intensa xornada deportiva dedicada ao motor.
A proba está organizada polo Club Motopark Lugo en colaboración coa Federación Galega e a Federación Asturiana de Motociclismo. Entre as categorías participantes figuran Elite MX1, Elite MX2, MX feminino, MX 85, MX 65 e diferentes modalidades máster, entre outras.
A actividade desenvolverase ao longo de toda a xornada no circuíto municipal. Os adestramentos arrancarán ás 11:00 horas, mentres que a competición oficial dará comezo ás 14:30 horas. A entrega de premios está prevista entre as 17:30 e as 18:00 horas.
A entrada terá un prezo de 5 euros para as persoas maiores de 14 anos.
Con motivo da celebración desta cita deportiva, a alcaldesa de Lugo, Elena Candia, e o concelleiro de Deportes, Damián Carballo, visitaron o Circuíto Municipal Jorge Prado para supervisar os traballos de acondicionamento das instalacións de cara ao desenvolvemento da competición.