Lugo acollerá o 6 de setembro o I Torneo Benéfico de Mus Concello de Lugo
Lugo acollerá o 6 de setembro o I Torneo Benéfico de Mus Concello de Lugo, un evento solidario cuxa recadación se destinará integramente á Asociación Capaces, entidade sen ánimo de lucro que apoia a persoas con Trastorno do Espectro Autista (TEA), trastornos da comunicación e as súas familias.
O torneo, organizado pola Asociación Cultural Lugo Museiros e a Asociación Gaudeamus, desenvolverase en horario de mañá e tarde, das 10:00 ás 14:00 horas e a partir das 16:30 horas. A inscrición ten un custo de 30 euros por persoa e realízase a través da aplicación MusTotal.
A organización prevé alcanzar as 50 parellas participantes, nunha cita dirixida ás persoas afeccionadas ao mus que queiran combinar a competición coa colaboración con esta entidade social.