Lugo acollerá unhas xornadas sobre os retos da defensa, a ciberseguridade e a intelixencia artificial
A UNED de Lugo celebrará o martes 3 de novembro as primeiras Xornadas de Defensa, tituladas "Defensa e seguridade no século XXI: da xeopolítica á intelixencia artificial". A iniciativa está organizada por ESPIGA, a UNED de Lugo e a Subdelegación de Defensa, coa colaboración da Subdelegación do Goberno.
Na inauguración, a subdelegada do Goberno en Lugo, Olimpia López, sinalou que o concepto de seguridade evolucionou nos últimos anos coa aparición de novas ameazas, como os ataques á ciberseguridade, a desinformación e os avances da intelixencia artificial. Neste contexto, defendeu que "a seguridade e os dereitos fundamentais non son conceptos contrapostos" e subliñou a importancia de protexer as liberdades e os principios democráticos.
López tamén agradeceu a implicación das entidades organizadoras e destacou o valor destes encontros para achegar á cidadanía cuestións relacionadas coa defensa e a seguridade.
As xornadas comezarán ás 9:00 horas na UNED de Lugo e contarán coa participación de Mariano Aguirre Ernst, analista internacional especializado en paz e conflitos; Federico Juste de Santa Ana, xeneral de división e xefe de Estado Maior do Mando Conxunto do Ciberespazo; Javier Candau Romero, subdirector xeral do Centro Criptolóxico Nacional; e Rosa Ricoy Casas, doutora en Dereito e investigadora especializada en dereitos fundamentais e novas tecnoloxías.
O programa abordará os principais desafíos para a seguridade europea, os conflitos bélicos na era dixital, a ciberseguridade e as consecuencias da intelixencia artificial para a democracia. A sesión completarase cunha mesa redonda centrada no papel da nova defensa para España e para a cidadanía.
A subdelegada incidiu na necesidade de fomentar o coñecemento e o debate público arredor destes retos e lembrou que "a seguridade só ten pleno sentido cando está ao servizo das persoas e das súas liberdades".