Lugo busca reforzar os seus vínculos con Arxentina e abrir novas vías de colaboración
Lugo quere reforzar os seus vínculos coa comunidade arxentina e abrir novas vías de colaboración nos ámbitos cultural, social e económico, aproveitando os lazos históricos e humanos que unen Galicia e Arxentina. A alcaldesa, Elena Candia, puxo en valor estas relacións durante a recepción á Cónsul Xeral da República Arxentina en Vigo, Silvina Isabel Montenegro, no Concello de Lugo.
Candia destacou a importancia de manter unha relación fluída coa representación diplomática arxentina en Galicia para favorecer novos espazos de encontro e cooperación e achegar a cidade á comunidade arxentina.
"Arxentina e Galicia comparten unha historia construída durante xeracións a través das persoas. Queremos que Lugo forme parte tamén dese vínculo e seguir abrindo portas a proxectos e iniciativas que nos permitan coñecernos, colaborar e estar máis preto", sinalou a alcaldesa.
Neste contexto, a reunión serviu para presentar as respectivas liñas de traballo e establecer un primeiro contacto co obxectivo de identificar ámbitos nos que o Concello e o Consulado poidan impulsar futuras iniciativas conxuntas.
Unha relación con dimensión cultural, social e económica
A intención do Goberno local pasa por aproveitar os vínculos existentes entre Lugo, Galicia e Arxentina para fomentar novas oportunidades de colaboración, tanto desde o punto de vista institucional como cultural, social e económico.
A Cónsul Xeral da República Arxentina en Vigo, Silvina Isabel Montenegro, está acreditada en España desde decembro de 2023 e a súa circunscrición abrangue Galicia, Asturias e as provincias de León e Zamora. Ademais, conta co rango diplomático de Ministra Plenipotenciaria de Segunda Clase.
Montenegro conta cunha ampla traxectoria no Servizo Exterior arxentino. Antes de asumir a responsabilidade consular en Vigo exerceu como directora da Muller e Asuntos de Xénero da Cancillería arxentina, posteriormente denominada Dirección de Asuntos de Xénero e Diversidade, e participou en diferentes espazos de política exterior e cooperación internacional.
O encontro forma parte da liña de traballo do Goberno local para reforzar as relacións institucionais de Lugo e ampliar a súa proxección exterior, coa intención de establecer contactos que poidan traducirse en novas oportunidades e proxectos para a cidade.