Lugo converteuse no epicentro do rugby galego esta fin de semana
Lugo acolleu a X Edición da concentración de Escolas Galegas de Rugby, organizada polo Muralla R.C. O evento, celebrado en horario matinal de 11:00 a 14:00 horas, reuniu a máis de 350 mozos rugbiers con idades comprendidas entre os 4 e 12 anos, acompañados polos seus adestradores e delegados, sumando un total de máis de 400 persoas inscritas.
Os 14 clubs de rugby de Galicia participaron no torneo, que se desenvolveu en dúas sedes simultaneamente. As categorías inferiores S6, S8 e S10 competiron no estadio de Pedreiras, emblemático para o rugby lucense desde hai máis de 20 anos. Pola súa banda, a categoría S12 disputou os seus encontros no campo de rugby de San Fiz, que por primeira vez acolleu un evento deportivo desta magnitude.
O rugby lucense, cuxos inicios remóntanse á década dos 80 con Xabarín e EUITA, está a piques de cumprir 40 anos. Baixo a denominación actual de Muralla R.C., é o segundo club que máis xogadores achega á competición. Este crecemento do rugby na cidade débese, ademais do esforzo do club, ao apoio das administracións locais, como o Concello, a Deputación e a Xunta, que valoraron o traballo realizado coa canteira.
Tarde de competición para Senior e Academia
A xornada non concluíu pola mañá, xa que pola tarde continuou a actividade rugbística. Ás 16:30, no estadio de Pedreiras, o equipo Senior do Muralla R.C. enfrontouse ao potente Vigo R.C., nun partido clave na súa loita por afastarse dos postos baixos da clasificación na Primeira División, LGR 1.
Por outra banda, o equipo S18 do Muralla R.C. viaxou a Pontevedra para medirse ante o Mareantes R.C., nun duelo crucial para conseguir a segunda posición da Liga Galega S18.
Con esta xornada repleta de rugby, Lugo reafirmou o seu papel como unha das cidades clave para o desenvolvemento deste deporte en Galicia.