Lugo descobre un busto en homenaxe á exalcaldesa Paula Alvarellos na Praza Maior
A Praza Maior de Lugo luce desde este mediodía unha escultura en homenaxe á exalcaldesa Paula Alvarellos, que foi descuberta nun acto presidido polo alcalde, Miguel Fernández.
A peza, realizada en bronce polo artista Miguel Couto, foi presentada como recoñecemento á traxectoria e contribución de Alvarellos á cidade. O acto celebrouse nunha data acordada previamente coa familia, coincidindo co Día dos Traballadores.
A escultura quedou instalada de forma provisional na parte traseira da Praza Maior, á espera do seu traslado definitivo a un dos xardíns do Parque Rosalía de Castro, un espazo vinculado especialmente á exalcaldesa e considerado un dos enclaves máis emblemáticos da cidade.
Durante a cerimonia realizáronse intervencións breves, entre elas a de familiares de Alvarellos, así como a lectura dun poema na súa memoria. O acto concluíu coa interpretación das cancións Imagine, de John Lennon, e The long and winding road, de The Beatles.