Lugo e Portugal estudan novas vías de colaboración en turismo, cultura e actividade empresarial
Reforzar os vínculos entre Lugo e Portugal e convertelos en novas iniciativas concretas foi o principal asunto abordado nun encontro no que tamén se puxeron sobre a mesa diferentes posibilidades de colaboración nos ámbitos do turismo, a cultura, a actividade empresarial, a mobilidade e a cooperación.
No eido turístico, analizáronse fórmulas para incrementar a conexión con Portugal e promover accións conxuntas que contribúan a dar a coñecer Lugo como destino cultural e patrimonial. A intención pasa por aproveitar a proximidade e os lazos históricos entre Galicia e Portugal para favorecer o intercambio de visitantes e impulsar novos proxectos.
A cultura constitúe outro dos ámbitos con potencial para estreitar esta relación. Neste sentido, púxose en valor o irmandamento entre Lugo e Viana do Castelo, vixente desde 1990, como unha base para recuperar e ampliar os intercambios e buscar novas fórmulas de cooperación entre ambas as cidades.
Durante o encontro tamén se analizaron as oportunidades existentes para favorecer a cooperación económica e empresarial, así como a importancia das conexións e da mobilidade para facilitar os intercambios entre Galicia e Portugal.
A intención compartida é avanzar nunha relación máis operativa e impulsar proxectos que permitan aproveitar os vínculos históricos, culturais e de proximidade existentes entre Lugo e Portugal.
A reunión celebrouse no Concello de Lugo e contou coa participación da alcaldesa, Elena Candia, e do concelleiro de Turismo e Museos, xunto co cónsul xeral de Portugal en Galicia, João Carlos Bezerra da Silva, que foi quen solicitou o encontro.
Ao remate, o concelleiro de Cultura e Museos, Agustín Gallego, acompañou o representante portugués nunha visita ao Vello Cárcere, onde puido coñecer este espazo cultural da cidade.