Lugo estrea a nova rampla no Miño mentres espera pola súa praia fluvial
Inauguran a nova pasarela de acceso ao río Miño, unha infraestrutura que permitirá á cidadanía gozar do río de forma segura. Esta apertura marca o final dun longo proceso burocrático que, segundo Alvarellos, foi dificultado polos sucesivos requirimentos do Goberno autonómico. A rexedora lucense destacou que, malia as trabas impostas pola Xunta de Galicia, a colocación desta pasarela sitúa a Lugo máis preto de conseguir unha zona de baño estable, un dos obxectivos do seu executivo.
"Non é a zona de baño que queremos para Lugo, pero é a mellor á que nos deixaron optar", afirmou Alvarellos. A alcaldesa tamén subliñou que a instalación da pasarela foi un logro dobre: "Por unha banda, conseguimos un acceso seguro ao Miño, aínda que máis tarde do previsto, e por outra, evidenciamos ante a veciñanza o boicot do que todas e todos os lucenses estamos a ser vítimas neste asunto".
Os trámites para a colocación desta infraestrutura prolongáronse durante todo o verán. Alvarellos lembrou que o seu goberno solicitou o permiso antes da tempada estival para que a cidadanía puidese gozar do río durante o verán, pero as esixencias da Xunta atrasaron a súa apertura ata hoxe. "É obvio que seguimos a ser reféns políticos e que o obxectivo segue sendo privar aos lucenses de gozar do río do mesmo xeito que outros concellos", engadiu.
A montaxe da pasarela realizouse sen custo adicional para as arcas municipais, utilizando materiais e medios propios, así como o servizo de socorrismo xa contratado. Alvarellos destacou que, a pesar das numerosas prospeccións e revisións esixidas pola Xunta, o seu goberno demostrou estar disposto a cumprir coas normativas medioambientais, aínda que lamentou que estas se utilizaran como unha "arma política". A nova pasarela de acceso ao río Miño xa está aberta ao público, permitindo un acceso seguro para todos os lucenses que queiran desfrutar do río, nun contexto de tensión política entre o Concello de Lugo e a Xunta de Galicia.