A concelleira de Cultura, Turismo e Promoción da Lingua, Maite Ferreiro, visitou as instalacións da Concellería de Educación e Difusión do Coñecemento para dar a benvida á nova xefa de servizo, Beatriz Pérez, quen se incorporou recentemente ao equipo. Ferreiro subliñou que a cobertura desta praza permitirá mellorar a atención á veciñanza e axilizar os procedementos da concellería, garantindo unha maior eficiencia.
A edil lembrou que este departamento municipal xestiona temas fundamentais para as familias, como os comedores escolares e as Escolas Infantís Municipais. "Estas escolas ofrecen un servizo integral de carácter social e educativo que abarca todas as fases do desenvolvemento infantil, desde a aprendizaxe da motricidade e a comunicación ata as primeiras pautas de convivencia e a relación co entorno", explicou Ferreiro, destacando a colaboración constante entre o ámbito escolar, a familia e o entorno físico.
Ferreiro tamén resaltou o esforzo económico do Concello de Lugo, que inviste anualmente máis de 1,5 millóns de euros no mantemento das escolas infantís, unha competencia que corresponde á Xunta de Galicia. "A pesar de non ser a nosa responsabilidade directa, continuamos realizando un gran esforzo económico e administrativo para garantir este servizo ás familias, mentres agardamos que a Xunta asuma as súas competencias e xestione estas escolas de forma directa", declarou a concelleira. A incorporación de Beatriz Pérez fortalecerá o equipo e permitirá seguir mellorando a atención e os servizos prestados ás familias lucenses.
