Lugo lembra o científico Armando Durán no 25 aniversario do seu falecemento
A alcaldesa de Lugo, Elena Candia, recibiu na Casa do Concello os fillos de Armando Durán Miranda con motivo do 25 aniversario do falecemento deste destacado científico lucense, nado en Lugo en 1913 e falecido en 2001. O encontro enmarcouse nos actos de lembranza celebrados este Día dos Defuntos no cemiterio de San Froilán, onde tivo lugar unha homenaxe con ofrenda floral.
Durán foi catedrático de Óptica na Universidade Complutense de Madrid e membro da Real Academia de Ciencias Exactas, Físicas e Naturais. A súa traxectoria estivo marcada polo compromiso de poñer o coñecemento ao servizo do ben común e tamén contribuíu ao impulso da Escola de Comercio. Durante a recepción, os seus fillos entregaron ao Concello un libro sobre a súa vida e obra.
Candia agradeceu á familia a xenerosidade mantida ao longo dos anos, especialmente coa cesión gratuíta ao Concello do mausoleo familiar en marzo de 2012, cumprindo así a vontade do científico. A construción, de estilo neogótico e procedente do antigo cemiterio de Magoi, data do século XIX e é unha das pezas funerarias máis singulares do cemiterio de San Froilán.
O valor histórico e artístico do mausoleo foi recoñecido en 2015, cando recibiu unha distinción no Concurso de Cemiterios de España na categoría de mellor monumento arquitectónico funerario. A alcaldesa destacou a importancia de lembrar Durán non só pola súa carreira científica, senón tamén pola súa personalidade sinxela e próxima.
Os seus fillos participaron posteriormente na homenaxe institucional organizada no cemiterio, que incluíu unha ofrenda floral e a actuación dunha formación de cámara de vento-metal da Banda Municipal de Música, encargada de interpretar varias pezas seleccionadas para a ocasión.