Lugo Monumental solicita maior transparencia sobre as obras no casco histórico
O pasado venres, 4 de outubro, membros da directiva da Asociación Lugo Monumental reuníronse coa alcaldesa Paula Alvarellos e o concelleiro Mauricio Repetto para abordar a situación das obras no casco histórico. A reunión deixou sen respostas claras á asociación, especialmente en relación cos prazos de finalización dos traballos e as medidas para mitigar os problemas que as obras causarán ao comercio durante a campaña de Nadal.
A Asociación manifestou o seu rexeitamento polo atraso nas obras, expresando a preocupación dos empresarios da zona ante a falta de previsións realistas. Segundo indicaron, necesitan datas concretas para poder planificar as súas campañas e pedidos de mercadoría. A alcaldesa amosou comprensión polo malestar, pero non foi quen de proporcionar prazos concretos, sinalando que "en breve" se notará un "gran impulso" nas obras. Lugo Monumental solicitou que se establezan prazos acordes coa realidade e que, unha vez vencidos, se apliquen as penalizacións estipuladas no contrato.
En canto á campaña de Nadal, desde o goberno local afirmaron que non se poden paralizar as obras nin redeseñalas para minimizar o impacto no comercio. Tamén se anunciou a apertura dunha nova gavia para servizos sanitarios e comunicacións no cruce entre Quiroga Ballesteros e Bolaño Rivadeneira, o que complicará aínda máis a situación. Outro tema tratado foi a modificación dos proxectos, que a asociación considera urxente tras o compromiso adquirido en abril de 2023, cando se logrou salvar as zonas verdes de Santo Domingo. A pesar da promesa, os cambios aínda non foron aprobados, aínda que dende o Concello aseguran que estarán "a punto de aprobarse".
Ademais, Lugo Monumental tamén expresou preocupación polos problemas de tráfico no centro histórico. A asociación pediu melloras na sinalización de accesos aos aparcadoiros, xa que moitos condutores descoñecen as entradas permitidas. A alcaldesa asegurou que xa se instalaron paneis informativos, pero comprometeuse a revisar a situación das sinais confusas. Outro punto de debate foi o tráfico de patinetes e motos de reparto na zona peonil, cuxa regulación queda pendente da futura ordenanza da Zona de Baixas Emisións (ZBE).
Tamén se solicitou liberar a rúa San Marcos do tráfico, unha petición xa realizada en xuño e que aínda non foi atendida. A alcaldesa explicou que as empresas encargadas da obra prefiren manter o tráfico como está para evitar maiores danos na rúa do Teatro. A reunión concluíu cun compromiso de revisión das cuestións plantexadas, pero sen solucións inmediatas, o que preocupa especialmente aos comerciantes do casco histórico ante a inminente campaña de Nadal.