Lugo opta ao 2 % Cultural para impulsar o Museo da Romanización no Cuartel de San Fernando
O Concello de Lugo formalizou ante o Ministerio de Vivenda e Axenda Urbana a súa candidatura á convocatoria do 2 % Cultural 2025 co obxectivo de facer realidade o Museo da Romanización de Galicia no antigo Cuartel de San Fernando. O Goberno local decidiu recorrer a esta liña estatal como alternativa ante a falta de avances por parte da Xunta de Galicia, administración con competencias en materia de patrimonio cultural.
O alcalde, Miguel Fernández, criticou a “marxinación” que, ao seu xuízo, sofre a cidade neste proxecto por parte do Executivo autonómico e defendeu que a creación do museo responde a unha “débeda histórica” cunha cidade que é referente do legado romano no noroeste peninsular. A proposta presentada contempla un investimento total de 15.201.235,59 euros e opta a unha subvención estatal do 75%, asumindo o Concello a porcentaxe restante.
O proxecto prevé a rehabilitación integral do inmoble, cunha superficie de 4.240 metros cadrados, para convertelo nun centro de conservación, investigación e divulgación do legado romano vinculado á antiga Lucus Augusti. O futuro espazo museístico estaría destinado a albergar máis de 15.000 pezas arqueolóxicas recuperadas en escavacións realizadas desde a década dos 90 ata a actualidade, fondos que, segundo o rexedor, a Xunta non está asumindo en materia de conservación e custodia.
A candidatura impulsada pola Alcaldía inclúe unha ampla memoria técnica, estudo de viabilidade, plan de mantemento e unha memoria de transcendencia supralocal, ao considerar que o impacto do museo iría máis alá do ámbito municipal e beneficiaría ao conxunto de Galicia. O alcalde lembrou que xa a comezos de século, baixo a presidencia de Manuel Fraga, a Xunta se comprometera con esta iniciativa, compromiso que, segundo indicou, deixou de ser prioritario a partir de 2012.
Fernández sinalou que outros proxectos arqueolóxicos impulsados na mesma etapa xa son unha realidade en Pontevedra, Ourense e A Coruña, mentres que en Lugo, asegura, non se produciron avances pese ás reiteradas demandas institucionais. Tamén comparou a situación con outros investimentos culturais promovidos pola Xunta, como os máis de 17 millóns de euros destinados ao Pazo de Lourizán ou os recursos comprometidos para a recuperación do Cinema Fraga, proxectos que, segundo afirmou, contan cun financiamento moi superior ao necesario para o museo lucense.
O alcalde incidiu en que o recinto amurallado, declarado Patrimonio da Humanidade pola UNESCO no ano 2000, segue sen dispor dun gran centro museístico que articule e explique a historia romana da cidade, e asegurou que o Concello non permanecerá “de brazos cruzados” ante esta situación.
O antigo cuartel, proxectado en 1779 baixo o reinado de Carlos III polo arquitecto Francisco Sabatini, constitúe un exemplo singular de arquitectura neoclásica militar ilustrada e conserva a súa estrutura orixinal arredor de patios porticados e arcadas de sillería. Trátase do único acuartelamento ilustrado construído na cidade e atópase no interior da Muralla, xunto a outros elementos patrimoniais como o Camiño Primitivo de Santiago e a Catedral de Lugo.
A intervención proposta aliñaríase cos criterios internacionais de conservación recollidos na Carta de Venecia de 1964 e busca non só recuperar o edificio desde o punto de vista arquitectónico, senón activalo como motor cultural, turístico e económico para o centro histórico e o conxunto do municipio.