Lugo recibe a un grupo de 15 refuxiados
A alcaldesa de Lugo, Paula Alvarellos, deu a benvida no salón de plenos da Casa do Concello a 15 persoas refuxiadas que forman parte do programa de protección internacional desenvolvido pola entidade social Diaconía. No acto, estivo acompañada pola concelleira de Benestar e Maiores, Olga López Racamonde. Durante a recepción, Alvarellos destacou o compromiso de Lugo coa diversidade e a integración, subliñando que "Lugo sempre foi unha cidade aberta á diversidade e comprometida coa integración".
A rexedora quixo tamén recoñecer a fortaleza e resiliencia das persoas refuxiadas, asegurándolles que a cidade será un lugar onde se sentirán acompañadas. "Esta é a súa nova casa, e estamos aquí para camiñar ao seu carón neste novo proxecto de vida", afirmou Alvarellos, rematando cunha mensaxe de apoio e esperanza. Este acto reafirma o compromiso do Concello de Lugo coas políticas de acollida e inclusión social, subliñando a importancia de ofrecer un entorno seguro e acolledor para aqueles que buscan refuxio e novas oportunidades.