Lugo renova a sinalización horizontal da Avenida de Madrid para mellorar a seguridade viaria
Vén de renovarse de forma integral a sinalización horizontal da Avenida de Madrid de Lugo, unha actuación que permite "mellorar a visibilidade na rúa, tanto para peóns como para os vehículos, o que implica maior seguridade viaria", sostivo o tenente de alcalde, Rubén Arroxo.
Arroxo lembrou que a área de Mobilidade conta cun contrato para o mantemento da sinalización horizontal en zonas urbanas, "cun investimento de 100.000 euros e unha duración inicial dun ano, prorrogable ata dous anos máis", explicou.
O contrato inclúe o repintado de marcas viarias como pasos de peóns e outras sinalizacións horizontais, ten como obxectivo "mellorar a visibilidade e a seguridade viaria en toda a cidade".
A Tenencia de Alcaldía planifica a realización destas intervencións nos meses de verán, aproveitando as condicións climáticas favorables desta época do ano, xa que o bo tempo é esencial para garantir a calidade do pintado.
Rubén Arroxo destacou o compromiso da Tenencia de Alcaldía coa mellora da sinalización horizontal na cidade, mellorando o formato do pintado para aumentar a seguridade de peóns, ciclistas e persoas con mobilidade reducida, reducindo resbalóns nos pasos de peóns e aumentando a seguridade.