Lugo terá autobuses de balde ata o recinto do Caudal Fest durante o festival
O Concello de Lugo ofrecerá autobuses gratuítos cada 15 minutos desde o centro da cidade ata as inmediacións do recinto do Caudal Fest durante os dous días do festival, o venres 20 e o sábado 21 de setembro. Esta medida, que se mantén dende a primeira edición do evento, permitirá aos asistentes desprazarse de forma cómoda e segura, evitando a dependencia de vehículos particulares e a busca de aparcamento.
A rexedora de Lugo, Paula Alvarellos, anunciou que os buses lanzadeira partirán desde a Praza de Bretaña, con saídas ininterrompidas desde ás 16:30 horas ata as 03:45 horas da madrugada. Alvarellos, xunto co edil de Dinamización Económica, Mauricio Repetto, supervisou esta mañá os traballos de montaxe do recinto do festival, que comezaron esta semana. “Queremos facilitar os desprazamentos cunha alternativa de mobilidade que, ademais de ser sostible, mellora a seguridade viaria ao evitar que os asistentes dependan de vehículos particulares”, comentou Alvarellos.
O Caudal Fest 2024 contará unha vez máis co apoio do Concello de Lugo e co patrocinio de Estrella Galicia, principal patrocinador privado do evento. A sexta edición do festival promete ser a máis exitosa ata o momento, cun cartel que inclúe artistas de renome como Amaral, Mikel Izal, Viva Suecia e Arde Bogotá. No 2023, o Caudal Fest atrajo a 37.567 persoas, xerando un retorno económico de 7,3 millóns de euros para o municipio e máis de 350 empregos directos e 2.000 indirectos, segundo recordou a rexedora.
Esta edición tamén incluirá dúas sesións vermú para dinamizar a contorna fluvial: o xoves 19 de setembro no novo espazo cultural do Carme, cun concerto da banda local Virtua Tennis, e o sábado 21 de setembro nas Caldas do Miño, con música electrónica do dúo de DJs Galician Army. “Estas cifras demostran a aposta do Goberno local pola industria cultural como motor da economía da cidade”, destacou Repetto.