Lugo tínguese de azul para conmemorar o Día da Enfermería
![muralla lugo alumeado 2](https://lugoxa.com/wp-content/uploads/2021/03/muralla-lugo-alumeado-2.jpg)
O Concello de Lugo conmemora o Día Internacional da Enfermería, 12 de maio, iluminando de azul a fachada da Casa Consistorial e a zona da muralla que vai dende a Mosquera ata San Pedro ao anoitecer, como homenaxe a un dos colectivos máis necesarios contra a pandemia.
Dende o Concello preténdese poñer en valor o vital e heroico traballo deste colectivo, nun momento no que están a demostrar a súa compaixón, valentía e profesionalidade na resposta á pandemia de coronavirus.
Lembrar tamén que a alcaldesa de Lugo, Lara Méndez, propuxo aos grupos municipais da Corporación lucense outorgarlles as Medallas de Ouro 2020 aos colectivos de profesionais que nesta pandemia protexeron e coidaron de toda a veciñanza. Galardón que simboliza a máxima distinción que a institución local pode entregar á cidadanía, e que segundo o propio regulamento indica, debe recaer só en persoas que teñen atribuídos méritos verdadeiramente extraordinarios.