Lugo únese no II Mercadillo Solidario Murallalandia para crear un parque infantil no HULA
O patio do IES Leiras Pulpeiro acolleu a celebración do II Mercadillo Solidario Murallalandia, unha iniciativa benéfica impulsada co obxectivo de recadar fondos para a creación dun parque infantil no Hospital Universitario Lucus Augusti (HULA). A cita reuniu a entidades, colectivos, clubs deportivos e veciñanza nunha xornada solidaria aberta á cidadanía.
Durante o evento, os asistentes puideron visitar distintos postos con xoguetes, libros, roupa, artesanía e outras propostas preparadas para a ocasión, nun ambiente familiar marcado pola convivencia e o apoio á infancia hospitalizada. Todo o recadado será destinado integramente ao proxecto do novo espazo infantil no hospital lucense, pensado para facer máis levadeira a estancia dos nenos e nenas ingresados.
A iniciativa contou tamén coa participación de representantes de diferentes clubs deportivos da cidade, entre eles xogadores do CD Lugo, da ADC Lugo Sala e Máximus, en representación do CB Breogán, amosando o compromiso do deporte lucense cunha causa solidaria que busca mellorar o benestar da infancia.
Concretamente, o xogador albivermello Álex Balboa desprazouse ata o centro educativo para entregar persoalmente unha camisola oficial do club asinada por todos os integrantes do primeiro equipo.
A camisola foi sorteada durante a xornada como parte das actividades organizadas para continuar incrementando a recadación solidaria. Desde o club destacaron a importancia de apoiar este tipo de accións sociais e agradeceron á organización de Murallalandia e ao IES Leiras Pulpeiro contar coa súa colaboración nesta edición.
O CD Lugo asegurou ademais que continuará participando en todas aquelas iniciativas que contribúan ao benestar, á mellora e ao desenvolvemento da sociedade lucense.