Lugo vístese de arco da vella dende o luns
O Goberno de Lara Méndez, a través da concellería de Muller e Igualdade, que dirixe Silvia Alonso, anunciou a programación con motivo do Orgullo LGTBIQA+, que comezará na tarde do 27 e celebrarase durante todo o día 28 de xuño.
Dous días “nos que teñen cabida actividades para todas as idades en defensa dos dereitos das persoas LGTBIQA+”, sinala a rexedora, que considera que "a lucense é maioritariamente unha sociedade respectuosa coa diversidade e as diferentes orientacións sexuais e de identidade de xénero e días como o de hoxe son para reivindicar unha loita que a todos e todas nos debe implicar para eliminar as discriminacións que aínda se manteñen e para lembrar a todas as persoas que aínda as sofren e ás que nos precederon nese labor”.
Lara Méndez e Silvia Alonso darán o pistoletazo de saída dos actos este luns, 27, ás 20.00 horas, coa posta en marcha dunha instalación artística e luminosa con motivo do Día do Orgullo na Casa Consistorial.
PROGRAMA
O martes, ás 16.30h, a Praza da Soidade acollerá dous talleres temáticos pola diversidade, concretamente un obradoiro de pintado decorativo de pedras coas cores do arco da vella e outro de estampado téxtil para a elaboración de deseños e consignas contra a LGTBIFOBIA. Todas as propostas fomentarán a parte máis creativa das persoas participantes dun xeito dinámico e os asistentes recibirán un lote individual de materiais.
Ao remate dos talleres, terá lugar, na mesma praza, un conto teatralizado, a cargo de Caxoto, denominado Planeta LGTBIQ. Nesta actividade participarán os nenos e nenas do programa municipal de conciliación Aprende Xogando, en quenda de mañá, co obxectivo de “educalos desde a infancia para que as crianzas entendan a existencia da diversidade, o que axudará a loitar contra a homofobia e evitará que se sintan rexeitados nun futuro”, apunta Alonso.
Xa ás 20.00 horas, o Concello participará, xunto ás asociacións de Lugo, Alas e Avante LGTB+, ademais de Agrocuir e Sete Outeiros, nunha manifestación pola igualdade e dignidade efectiva e real. A manifestación, que sairá desde a praza Horta do Seminario percorrerá Bispo Aguirre, Rolda da Muralla – ata a porta de San Fernando-, rúa San Fernando, Bolaño Ribadeneira, Quiroga Ballesteros e Praza da Soidade, onde se realizará a lectura dun manifesto.
Para finalizar o día, a partir das 21.00 h., organizarase na Praza da Soidade unha festa de pos de cores con sesión DJ. Un evento no que se pretende, sostén a concelleira, "xerar un ambiente festivo que motive á cidadanía a gozar da cidade durante esta conmemoración".
