Lugopoética 2026 combina poesía e música na súa terceira sesión en Lugo
Este xoves 23 de abril ás 18:30 horas, a sede da UNED en Lugo acollerá a terceira das seis sesións de Lugopoética 2026, unha iniciativa promovida por Egeria co apoio da UNED Lugo e da Xunta de Galicia, que celebra este ano a súa terceira edición.
A actividade estará coordinada por Xosé Carlos Ulloa e contará coa participación dos creadores Xosé Lois García e Ramón Rodríguez Porto, que lerán e comentarán unha selección dos seus textos poéticos ao longo do encontro.
Nesta ocasión, o proxecto introduce unha novidade destacada coa presenza da música en directo. Ánxelica Darriba Fernández, de 12 anos e natural de Friol, alumna das Escolas de Música Mancomunadas de Rábade, Begonte, Outeiro de Rei e Friol, interpretará varias pezas coa frauta traveseira durante o acto, achegando un diálogo entre disciplinas artísticas.
Deste xeito, poesía e música entrelázanse nesta sesión, unha fórmula que se manterá nas vindeiras citas do ciclo coa participación doutros estudantes das escolas musicais implicadas.