Máis dunha vintena de persoas participan nunha nova andaina polas parroquias de Becerreá
As andainas guiadas polas parroquias de Becerreá continúan achegando á veciñanza a historia e o patrimonio do municipio. A iniciativa está impulsada por Carlos Gegúndez, Guía Oficial de Galicia, e o Concello de Becerreá, en colaboración coa Asociación Os Grobos, e busca dar a coñecer a historia das diferentes parroquias ao tempo que promove a práctica de hábitos saudables.
Nesta ocasión participaron máis dunha vintena de persoas, que percorreron diferentes puntos da zona oriental do municipio. Durante o itinerario tiveron a oportunidade de visitar as casas señoriais de Corme e Horta, así como o antigo mesón desta última localidade, situado xunto á antiga estrada Nacional VI.
A ruta incluíu tamén unha visita ao patrimonio relixioso das parroquias de Morcelle e Agüeira, acompañada de explicacións sobre a historia das parroquias situadas nesta parte do concello.
O percorrido rematou no bosque dos Grobos, un dos principais referentes naturais de Becerreá. Alí, as persoas participantes puideron contemplar a paisaxe do afloramento kárstico, formado pola acción erosiva da auga sobre a rocha calcaria ao longo de milleiros de anos.