Miles de persoas seguiron a eclipse total de Sol desde a Muralla, a Praza Maior e o Parque Rosalía
Lugo viviu este 12 de agosto unha das xornadas máis especiais e multitudinarias dos últimos anos coa celebración da eclipse total de Sol, un fenómeno astronómico histórico que reuniu a milleiros de persoas en distintos puntos da cidade para contemplar un espectáculo que tardará décadas en repetirse en condicións similares.
A Praza Maior, a Muralla de Lugo e o Parque Rosalía de Castro convertéronse nos principais espazos de observación, onde veciñanza e visitantes compartiron a emoción de ver como a Lúa ocultaba completamente o Sol durante algo máis dun minuto. O ceo despexado permitiu seguir o fenómeno en condicións óptimas, facendo que a experiencia resultase especialmente impactante.
A programación organizada arredor da eclipse contribuíu a converter a xornada nun auténtico evento de divulgación científica e participación cidadá. Grazas ao traballo desenvolvido por Campus Terra USC e CITMAga, o público puido non só observar o fenómeno, senón tamén comprender mellor os seus aspectos científicos e a súa relevancia astronómica.
Entre as actividades desenvolvidas ao longo do día destacaron o reparto de lentes homologadas para a observación segura da eclipse, as observacións mediante telescopios solares e sistemas de proxección, os obradoiros dirixidos á rapazada para construír cámaras estenopeicas e a instalación dunha pantalla xigante desde a que seguir en directo a evolución do fenómeno.
A programación completouse con distintas propostas culturais e de lecer, como a actuación musical de Sonidonia, unha nova sesión de Cine na Rúa coa proxección da película Amigos Imaginarios e un pasarrúas a cargo de Kairanka, que animou diferentes rúas do centro histórico durante a tarde.
A iniciativa tamén contou cun proxecto participativo de carácter artístico e documental. A través de UMBRA, impulsouse a creación dun arquivo fotográfico colectivo sobre a eclipse en Lugo e na provincia. As imaxes recompiladas servirán para conformar unha futura exposición e un fotolibro que recollerá diferentes visións e experiencias deste acontecemento histórico.
O dispositivo especial despregado para a ocasión permitiu que a xornada se desenvolvese con normalidade e seguridade. Policía Local, Policía Nacional, Bombeiros, Protección Civil e numerosos voluntarios colaboraron na organización dun evento que congregou a miles de persoas nos principais puntos de observación da cidade.
O proxecto 'Eclipse 2026.8.12 en Lugo', promovido polo Centro de Investigación e Tecnoloxía Matemática de Galicia (CITMAga) e a Universidade de Santiago de Compostela, contou ademais coa colaboración de diferentes institucións e entidades, convertendo Lugo nun dos grandes referentes da observación da eclipse en Galicia.
A resposta do público e o éxito da organización confirmaron o interese que espertou este fenómeno astronómico excepcional, deixando imaxes e lembranzas que permanecerán durante moito tempo na memoria colectiva da cidade.