Miranda acollerá un curso gratuíto de restauración de mobles a finais de xullo e comezos de agosto
A Asociación Cultural e Veciñal de Miranda, no concello de Castroverde, organizará un curso gratuíto de restauración de mobles que se desenvolverá entre os días 27, 29 e 31 de xullo e o 3, 5 e 7 de agosto.
A iniciativa pretende ofrecer aos participantes a oportunidade de aprender técnicas básicas para recuperar e dar unha segunda vida a mobles antigos ou deteriorados.
As sesións impartiranse en horario de 10:00 a 14:00 horas na Casa da Cultura, situada no Local Social de Miranda. O curso está dirixido tanto aos socios da entidade como ao público en xeral e será totalmente gratuíto.
A selección das persoas participantes realizarase por rigorosa orde de inscrición, polo que a organización recomenda formalizar a solicitude canto antes debido ao número limitado de prazas.
As persoas interesadas poden solicitar máis información ou formalizar a súa inscrición chamando ao teléfono 663 670 650. A actividade conta coa colaboración da Vicepresidencia da Deputación de Lugo.