Monterroso aproba o maior orzamento da súa historia con preto de 4,9 millóns de euros
O Pleno ordinario do Concello de Monterroso deu luz verde ao Orzamento Xeral correspondente ao exercicio 2026, unhas contas que alcanzan os 4.922.632,35 euros e que se converten nas máis elevadas aprobadas ata o momento no municipio. O documento permitirá impulsar novos investimentos e reforzar diferentes servizos públicos municipais.
A proposta saíu adiante por maioría absoluta co respaldo dos tres integrantes do equipo de Goberno, dos concelleiros non adscritos Pablo Losada e Antonio Gato, así como do edil de Independentes por Monterroso (IxM), Luís Mariño Castro. Pola contra, os representantes do PSOE e do Partido Galego votaron en contra da proposta, mentres que o concelleiro do BNG optou pola abstención.
Desde o Goberno municipal agradeceron publicamente o apoio recibido durante a sesión plenaria e sinalaron que os representantes que respaldaron o documento souberon antepoñer o interese xeral do municipio a outras cuestións de carácter político. O alcalde de Monterroso, Eloy Pérez, destacou que nun contexto no que a confrontación política adoita ocupar un lugar destacado, resulta necesario recoñecer a responsabilidade institucional das persoas que decidiron apoiar un documento elaborado, segundo indicou, pensando nas necesidades da veciñanza e no futuro do municipio.
Un dos aspectos máis destacados das novas contas municipais é o apartado destinado a investimentos reais, que mobiliza un total de 1.438.618,60 euros, unha das maiores apostas investidoras realizadas polo Concello.
INVESTIMENTOS SOCIAIS
Entre as actuacións previstas figura unha partida superior ao medio millón de euros destinada a investimentos de carácter social, centrados principalmente na reforma, ampliación e transformación da actual Vivenda Comunitaria nunha futura residencia ou fogar residencial. O obxectivo desta actuación é mellorar a atención dirixida ás persoas maiores e dependentes.
O documento económico tamén contempla un importante esforzo destinado á mellora das infraestruturas municipais mediante actuacións de humanización de espazos públicos, a construción da senda peonil Sirgal-Monterroso e outras intervencións urbanas. Tamén se recollen investimentos orientados ao deporte e aos equipamentos municipais, coa mellora das instalacións deportivas existentes e da Cúpula Municipal.
Outra das liñas de actuación previstas céntrase no incremento do patrimonio municipal mediante a adquisición de terreos e a planificación futura da Peneda. Así mesmo, as contas incorporan novos recursos para impulsar a promoción turística e reforzar o atractivo de Monterroso como destino ligado ao Camiño de Santiago e ao seu patrimonio.
O rural continúa sendo outro dos eixos prioritarios deste orzamento. Neste ámbito, inclúense actuacións para mellorar camiños municipais, realizar rozas preventivas fronte aos incendios, adecuar vías públicas e recuperar espazos naturais.
Ademais, o Concello reforzará o apoio ao tecido asociativo mediante unha partida superior aos 90.000 euros. Esta contía permitirá incrementar as subvencións nominativas destinadas a entidades culturais, sociais e deportivas para favorecer o desenvolvemento das súas actividades.
Desde o Goberno municipal tamén puxeron o foco no ámbito social, que consideran un dos principais piares deste documento económico. O alcalde sinalou que o principal valor destas contas non reside exclusivamente na capacidade investidora, senón no importante esforzo realizado en políticas sociais.
Neste sentido, o Concello destina 2.129.740,17 euros ao capítulo de persoal, garantindo os recursos humanos necesarios para manter servizos considerados esenciais, entre eles o Servizo de Axuda no Fogar, o Centro de Día, a Escola Infantil Municipal, a Ocioteca, os campamentos municipais, os programas de conciliación, Xantar na Casa, o transporte adaptado e outros programas de atención social.
A esta cifra engádense outros 1.226.027,52 euros destinados ao funcionamento e mantemento destes servizos públicos, consolidando unha estratexia que, segundo o Executivo local, sitúa ás persoas no centro das políticas municipais.
Entre as medidas incluídas destaca tamén o reforzo da Escola Infantil Municipal coa ampliación do persoal para habilitar unha nova aula destinada a atender todas as solicitudes de praza xeradas polo incremento dos nacementos rexistrado durante o último ano. O Goberno local considera esta circunstancia especialmente positiva para un municipio rural como Monterroso.
SITUACIÓN FINANCEIRA
Outro dos aspectos destacados do documento económico é a situación financeira do Concello. Monterroso mantén actualmente débeda financeira cero, unha situación que, segundo explican desde o Executivo local, permite afrontar novos investimentos con estabilidade e recorrer ao financiamento unicamente para executar proxectos orientados a incrementar o patrimonio municipal e mellorar servizos públicos.
Desde o equipo de Goberno atribúen estes resultados ao traballo desenvolvido durante os últimos anos. Neste sentido, lembran que os tres integrantes do Executivo municipal levan tres anos desempeñando as súas funcións sen percibir salario por parte do Concello, dedicando tempo e esforzo ao desenvolvemento da súa actividade institucional.
O alcalde lamentou tamén que non se acadase un maior consenso político arredor dun documento que considera positivo para o municipio, aínda que mostrou respecto polo sentido do voto expresado por cada grupo político.
A aprobación definitiva destas contas permitirá agora ao Concello contar cunha folla de ruta que, segundo o Goberno municipal, proporcionará estabilidade, investimentos e melloras nos servizos públicos. O Executivo local afronta agora a súa execución coa intención de transformar as previsións orzamentarias en actuacións concretas que poidan traducirse en melloras perceptibles para a cidadanía nos próximos meses.
OPOSICIÓN DO PSOE
O Grupo Municipal Socialista de Monterroso votou en contra dos Orzamentos Municipais para o exercicio 2026 durante o pleno ordinario celebrado este martes ao considerar que as contas presentadas polo goberno local non responden ás necesidades reais do municipio e presentan importantes dúbidas sobre a súa viabilidade económica.
O portavoz socialista, Rafael García, mostrou a súa preocupación pola estrutura financeira do documento e advertiu de que, ao seu xuízo, as contas nacen con problemas de base ao incumprir as regras fiscais. Segundo indicou, resulta especialmente preocupante que o orzamento dependa dunha operación de crédito por valor de 800.000 euros e de ingresos que considera non garantidos.
García cuestionou tamén a contradición que, segundo sostén, existe entre o discurso político mantido polo executivo local sobre a ausencia de débeda e a decisión de recorrer novamente a financiamento bancario. O voceiro socialista sinalou que non se pode trasladar unha mensaxe á cidadanía e actuar de maneira diferente nos documentos oficiais.
Desde o PSdeG explicaron que o capítulo de investimentos ascende aproximadamente a 1,4 millóns de euros, aínda que consideran especialmente preocupante a forma prevista para o seu financiamento. Segundo detallou Rafael García, arredor de 91.600 euros procederían de recursos propios do Concello, mentres que 800.000 euros dependerían dun préstamo bancario. Os outros 547.000 euros previstos figuran como achegas doutras administracións, aínda que, segundo denunciou o grupo socialista, non existiría documentación que garanta a chegada deses fondos.
O portavoz do PSdeG asegurou que non existen convenios asinados nin compromisos formais que avalen esas cantidades económicas, unha situación que, segundo sostén, resta credibilidade ao documento económico presentado polo goberno local.
Máis aló da cuestión financeira, García explicou que a formación socialista non cuestiona de maneira específica cada un dos investimentos incluídos nas contas, pero si considera que falta unha estratexia clara de futuro para Monterroso. Neste sentido, lamentou a ausencia de actuacións que considera prioritarias para o municipio, entre elas unha nova estación depuradora de augas residuais, avances no desenvolvemento urbanístico a través dun Plan Xeral de Ordenación Municipal ou medidas destinadas á creación dunha residencia para persoas maiores.
O voceiro socialista tamén criticou a posición do Partido Popular respecto á atención das persoas maiores, lembrando que a creación dunha residencia ou dun fogar residencial continúa sendo unha demanda pendente no municipio. Segundo indicou, a veciñanza merece respostas e planificación a longo prazo.
Desde o PSdeG insisten en que a súa negativa a apoiar os orzamentos responde a criterios de responsabilidade política e económica. A formación considera que Monterroso precisa unhas contas máis realistas, solventes e enfocadas ás necesidades da veciñanza, fronte a un documento que, segundo sosteñen, prioriza a imaxe pública fronte á planificación efectiva.