Monterroso celebra o Día do Libro cunha tarde de contos na biblioteca municipal
O Concello de Monterroso conmemorará o Día do Libro cunha proposta cultural pensada para todos os públicos, especialmente para o familiar, a través dunha tarde de contos que terá lugar na Biblioteca Pública do Espazo Lorenzo Varela.
A iniciativa busca fomentar o gusto pola lectura e achegar a narración oral á veciñanza nunha xornada sinalada para o mundo das letras.
A actividade desenvolverase o 23 de abril a partir das 18:00 horas e contará coa participación do narrador Anxo Moure, coñecido polas súas sesións de contacontos que combinan humor, imaxinación e mensaxes vinculadas á natureza e aos valores sociais.
Deste xeito, o Concello aposta por dinamizar a biblioteca municipal e ofrecer unha alternativa cultural arredor do libro, coincidindo coa celebración internacional desta data.