Monterroso celebrou unha nova edición de San Cristovo co tradicional desfile de vehículos
Monterroso celebrou este venres unha nova edición da festividade de San Cristovo cun desfile no que participaron numerosos coches, furgonetas, camións, motos e vehículos agrícolas. Tras a misa, todos eles recibiron a tradicional bendición.
O desfile estivo amenizado polo grupo de gaitas Falcatrueiros Monterroso e reuniu a moito público fronte á igrexa de San Miguel. A bendición dos vehículos foi oficiada polo cura nun acto presidido polo alcalde de Monterroso, Eloy Pérez. Entre os participantes destacou a condutora máis nova da xornada, unha nena de sete meses e medio.
A programación continuou na Área Recreativa da Peneda coa actuación musical de Os Charangos de Neda e coas tradicionais comidas familiares. Xa pola noite déronse a coñecer os gañadores dos premios aos vehículos mellor engalanados.