Monterroso colaborará coa Universidade de Vigo para acoller alumnado en prácticas
O alcalde de Monterroso, Eloy Pérez Sindín, asinou o convenio de cooperación educativa remitido pola Universidade de Vigo para a realización de prácticas académicas externas por parte do estudantado universitario.
O acordo, que terá unha vixencia de catro anos, permitirá ao Concello de Monterroso incorporar estudantes procedentes da institución académica para desenvolver períodos de formación práctica nas diferentes áreas municipais.
A iniciativa ten como principal obxectivo complementar a formación do alumnado universitario, facilitándolle unha aproximación ao ámbito profesional e contribuíndo a mellorar a súa preparación de cara á futura incorporación ao mercado laboral.
Coa sinatura deste convenio, o Concello de Monterroso e a Universidade de Vigo reforzan a súa colaboración institucional no ámbito da formación e da preparación académica, impulsando novas oportunidades de aprendizaxe práctica para o estudantado.