Mougán celebrará a XXVII Festa do Pemento o sábado 2 de agosto
A parroquia de Mougán, en Guntín, acollerá o vindeiro sábado 2 de agosto de 2025 a XXVII edición da súa tradicional Festa do Pemento, unha cita xa consolidada no calendario festivo da comarca lucense. A xornada estará cargada de actividades gastronómicas, musicais e lúdicas para todos os públicos.
Os actos comezarán ás 13:30 horas co pregón e a sesión vermú a cargo do Dúo Élite. Ás 15:00 horas terá lugar unha das citas máis esperadas: a degustación de pementos e churrascada de balde para todos os asistentes.
Pola tarde celebrarase un campionato de tute, seguido do tardeo ás 18:00 horas con música a cargo de DJ Min.
A festa continuará ás 22:00 horas cunha nova degustación de pementos e cea gratuíta. A organización anima á veciñanza a colaborar mercando camisetas ou gorros do evento.
Como broche final, a partir das 23:30 horas terá lugar a verbena, amenizada polos grupos Bahía e o Gran José Costas, garantindo unha noite de festa e baile.