Navia de Suarna acollerá este sábado a sexta edición do recital poético-musical ‘S.O.S. Castelo de Navia’
A Asociación Veciñal Irmandade Naviega celebrará este sábado 30 de maio a sexta edición do recital poético-musical ‘S.O.S. Castelo de Navia’, unha cita cultural que volverá converter Navia de Suarna nun punto de encontro para a poesía e a música chegadas desde distintos puntos de Galicia e Asturias.
O evento reunirá a creadoras e creadores procedentes de diferentes localidades co obxectivo de poñer en valor a literatura e a música como ferramentas de dinamización cultural e social no territorio. Entre as persoas participantes figuran Delfina Amoroso, J. V. Barcia Magaz, Marica Campo, Tareixa Campo, Fernando da Serra, Eva do Roxo, Beatriz Dourado, Xosé Fernández Fernández, Antom Fortes, Paloma García Méndez, Ana Belén Gómez, Begoña Martín Acero, Suso Meilán, Xosé Miranda, Brenda Mondelo, Simón Rodríguez “Galego de Caracas” e Sara Veiga.
A programación contará tamén coa actuación musical do Dúo Minguante, que acompañará a xornada cunha proposta artística en directo que servirá de complemento aos distintos recitais poéticos previstos ao longo do día.
A actividade arrancará ás 11:30 horas co punto de encontro na Ponte Nova. A partir das 12:00 horas desenvolveranse diferentes intervencións poéticas en varios espazos emblemáticos da contorna, como o pé da ponte medieval, a propia ponte, Chaudatorre e Subcastelo.
No primeiro dos recitais, previsto para as 12:00 horas ao pé da ponte medieval, participarán Yolanda Alcas, Delfina Amoroso, J. V. Barcia e Marica Campo. Media hora despois, na ponte medieval, será a quenda de Tareixa Campo, Fernando da Serra, Xosé Fernández Fernández e Antom Fortes.
Ás 13:00 horas, o programa trasladarase a Chaudatorre, onde intervirán Ana Belén Gómez, J. L. Graña, Mercedes, Suso Meilán e Xosé Miranda. Posteriormente, ás 13:30 horas, Subcastelo acollerá as lecturas de Rafa Ramos, Simón Rodríguez “Galego de Caracas”, Sara Veiga e Yoli.
A xornada continuará ás 14:00 horas cun encontro colectivo e, media hora máis tarde, celebrarase un xantar no Café Bar Xegunde. Xa pola tarde, ás 17:00 horas, as actividades retomaranse en Casa Quiñones cun novo recital colectivo. O peche da programación terá lugar ás 19:00 horas cun último encontro na discoteca, no que recitarán exclusivamente as persoas que aparecen no cartel oficial do evento.
A iniciativa conta co patrocinio do Concello de Navia de Suarna e da Área de Cultura da Deputación de Lugo, consolidando así o respaldo institucional a unha cita cultural xa asentada no calendario da comarca.