Negueira de Muñiz acollerá en abril as VI Xornadas de Desenvolvemento Rural Ciencia na Aldea
A localidade de Pena de Nogueira, no concello de Negueira de Muñiz, volverá ser escenario das Xornadas de Desenvolvemento Rural Ciencia na Aldea, que celebrarán a súa sexta edición os días 24, 25 e 26 de abril.
A iniciativa está promovida pola Asociación Corripa e busca consolidarse como un espazo de encontro e reflexión sobre o futuro do rural desde unha perspectiva científica, cultural e ambiental.
Na edición anterior, o encontro adquiriu un marcado carácter internacional coa presenza de representantes do Festival das Herbas Espontáneas de Ussaramanna, na illa italiana de Sardeña.
O programa desenvolveuse no Ecomuseo O País do Abelleiro e ao longo das tres xornadas, arredor de 30 participantes entre investigadores, gandeiros e divulgadores procedentes de España e Italia participaron en conferencias, debates e diferentes actividades orientadas a analizar os retos e oportunidades do medio rural.