Novo alumeado público no CEI Nodus de Lugo
![alumeado cei nodus lugo alexandre penas](https://lugoxa.com/wp-content/uploads/2022/02/alumeado-cei-nodus-lugo-alexandre-penas.jpg)
O concelleiro de Infraestruturas Urbanas, Alexandre Penas, visitou o CEI Nodus, onde o Goberno de Lugo está a instalar novo alumeado público. Con esta actuación avanzase na mellora da rede de alumeado público e mellorase do mesmo xeito a imaxe desta zona da cidade, ademais de eliminar unha zona escura da cidade, instalarase un alumeado eficiente que permitirá aforrar os custos de consumo eléctrico soportados polo Concello.
A concellería de Infraestruturas instalou 3 novos proxectores LED asimétricos, que permiten un maior alcance que os tradicionais, sobre as columnas existentes na zona. Ademais, instalouse unha nova columna de 9 metros de altura cunha luminaria vial, que permitirá mellorar a visibilidade. En total, investíronse 6.245,43 eurros.
Nos últimos dous anos a área de Infraestruturas renovou o alumeado en múltiples zonas da cidade, instalando novas luminarias en rúas como a avenida Filharmónica Lucense, que non contaba con alumeado público, e reducindo a cantidade de luminarias con elementos contaminantes, como o vapor de sodio ou de mercurio instaladas na cidade.
Desde a concellería de Infraestruturas continúase a investir na renovación da rede de alumeado, con distintos proxectos postos en funcionamento por toda a cidade, que se executarán durante o 2022.