O Auditorio Gustavo Freire de Lugo acollerá unha gran programación teatral
O Auditorio Gustavo Freire de Lugo acollerá unha gran programación teatral durante os primeiros meses de 2025.
A programación inclúe en total 29 actividades, con 12 propostas para público adulto, 5 enmarcadas no ciclo Lugo en Danza, 10 para público familiar e 3 para a primeira infancia entre o 11 de xaneiro e o 18 de maio. Ademais, conta con espazos para público adulto e familiar, ademais de con ciclos de danza e co ciclo de teatro para a primeira infancia, con actividades de formato reducido para as nenas e nenos máis pequenas.
"Quixemos poñer o foco nas producións de artes escénicas de mellor calidade feitas en Galicia, que serán o fío condutor da programación, e contaremos tamén con obras internacionais de calidade contrastada", explicou Maite Ferreiro, que engadiu "esta programación está pensada para o deleite das amantes do teatro e para facilitar un achegamento a esta arte por primeira vez, traendo a Lugo o mellor do teatro e da danza galega xunto cunha coidada selección de propostas premiadas en importantes festivais".
Para acceder ao recinto será preciso adquirir entrada no portal Entradas Lugo ou de maneira presencial na oficina municipal de turismo, cun prezo de 5 euros nas actividades para público adulto e de danza, e 3 nas actividades familiares e de 1ª infancia.
Ademais haberá bonos a un prezo de 36 euros nas actividades para público adulto e de 20 euros para as actividades dedicadas a público familiar, que permitirán acceder ás distintas actividades. No caso do ciclo Primeira Infancia, o bono terá un prezo de 6euros e para as actividade de danza, 15 euros.
As persoas en paro, menores de 30, pensionistas e actores e actrices asociadas á AAAG terán un desconto do 30 % nas actividades para público adulto.