O benestar dixital familiar centra unha xornada da Xunta en Lugo o 13 de decembro
A Consellería de Sanidade celebrará o sábado 13 de decembro, no edificio administrativo de usos múltiples da Xunta en Lugo, unha Xornada de benestar dixital familiar coa finalidade de promover unha convivencia equilibrada coas pantallas e cos dispositivos electrónicos no ámbito doméstico, ademais de impulsar hábitos responsables na contorna dixital.
A iniciativa, organizada pola Dirección Xeral de Saúde Pública, pon o foco en atopar unha harmonía entre o tempo dedicado ás actividades dixitais e os espazos compartidos en familia. Tamén busca orientar ás unidades familiares cara á selección de contidos educativos ou de entretemento que acheguen valor e establecer normas de comportamento nas que os adultos actúen como referentes para os máis pequenos.
O evento desenvolverase entre as 12 horas e as 20 horas e está pensado para que participen todos os membros da familia, articulándose arredor de catro bloques de actividades. Por unha banda, organizarase un torneo de Mario Kart no que persoas adultas e nenos competirán nun campionato pensado para distintas xeracións. Paralelamente, impartirase un obradoiro no que se ofrecerán ferramentas e recomendacións sobre contidos axustados a cada idade.
A terceira proposta consistirá en sesións que combinarán xogos tradicionais con actividades de lecer dixital, co propósito de integrar ambas opcións na vida diaria. Finalmente, impartirase un obradoiro centrado nas últimas tendencias do ocio dixital e nos retos tecnolóxicos que se aveciñan, como a realidade virtual ou a intelixencia artificial.
Ademais destas accións, a xornada contará con espazos formativos, zonas de recreo e outras experiencias enfocadas en crear un ambiente agradable e participativo.
A participación será totalmente gratuíta e non será necesario realizar unha inscrición previa. As familias interesadas só deberán achegarse ao edificio da Xunta en Lugo, situado na rolda da Muralla. Unha vez alí, cubrirán un formulario mediante un código QR para recompilar información sobre os seus hábitos dixitais e datos persoais, co obxectivo de crear unha base de datos que permita avaliar posteriormente os avances do plan.
Estes cuestionarios recolleranse tanto en formato físico como por correo electrónico e quedarán almacenados nunha base de datos para realizar un seguimento ao cabo dun mes. Deste modo, poderase medir o impacto das novas rutinas adoptadas e o efecto que teñen no día a día de cada familia.