O BNG acusa á Xunta de relegar Lugo nos orzamentos de 2027 pola aposta pola Rolda Leste
O BNG de Lugo considera que os orzamentos da Xunta de Galicia para 2027 non responden ás necesidades da cidade e manteñen sen solución demandas que levan anos pendentes. O portavoz nacionalista no Concello, Rubén Arroxo, critica especialmente que o Goberno galego volva apostar pola Rolda Leste sen atender as alternativas propostas para reducir o seu impacto ambiental.
Arroxo instou a alcaldesa de Lugo, Elena Candia, a aclarar a súa posición ante unhas contas que, ao seu xuízo, non sitúan a cidade entre as prioridades autonómicas. "A alcaldesa ten que explicar se vai defender os intereses de Lugo ou se vai respaldar sen condicións unhas contas que non sitúan a nosa cidade entre as prioridades da Xunta", afirmou.
O portavoz do BNG advertiu de que os orzamentos deben valorarse polos investimentos que se executan e polas necesidades ás que dan resposta, e non unicamente polas partidas anunciadas. "Lugo leva anos vendo como se repiten partidas para determinadas infraestruturas mentres os proxectos non avanzan. A veciñanza precisa compromisos reais, obras executadas e solucións aos problemas da cidade", sinalou.
Críticas ao impacto ambiental da Rolda Leste
O BNG sitúa a Rolda Leste como un dos exemplos da falta de resposta ás demandas da cidade. A formación denuncia que a Xunta volva destinar recursos a esta infraestrutura sen asumir as alternativas formuladas para protexer a contorna do río Rato.
Segundo o partido nacionalista, a actuación prevista afectaría zonas verdes e carballeiras que forman parte do patrimonio natural de Lugo, ademais de ter incidencia na parroquia de Bosende.
Arroxo lembrou que o BNG promoveu iniciativas no Concello, presentou alegacións ao proxecto e impulsou unha campaña de recollida de sinaturas para reclamar un cambio de trazado. "A cidadanía expresou a súa preocupación polo impacto ambiental desta estrada, polo que non se pode gobernar de costas á veciñanza", defendeu.
O portavoz reclamou á Xunta que abandone a súa aposta pola proposta actual e estude outras opcións que garantan a conservación dos espazos naturais. "Non ten sentido comprometer recursos públicos nun proxecto que pode causar un dano importante ao contorno do río Rato cando existen outras prioridades e propostas sobre a mesa. Lugo precisa investimentos útiles, respectuosos co medio ambiente e pensados para mellorar a vida da veciñanza", concluíu.
O BNG pide así que o Goberno galego revise as súas prioridades para Lugo e que o executivo municipal reclame investimentos e compromisos concretos. "Lugo necesita un goberno municipal que reclame investimentos e compromisos concretos, non que dea por boas unhas contas que non responden ás necesidades da veciñanza", rematou Arroxo.