Política

Maite Ferreiro denuncia a eliminación do Lugo Máxico e Rubén Arroxo critica a falta de explicacións sobre as facturas e sobre como afrontará o Concello a previsión de case seis millóns de euros

O BNG de Lugo acusou este xoves o Goberno municipal do Partido Popular de «recortar a programación cultural» e de manter pendentes de pagamento 542 facturas a autónomos e pequenos empresarios, tras as comisións municipais de Cultura e Contas celebradas este 17 de setembro. As dúas cuestións centráronse nas críticas das concelleiras e concelleiros nacionalistas á xestión do executivo local e á súa falta de explicacións sobre distintos asuntos municipais.

Na Comisión Municipal de Cultura, a concelleira do BNG Maite Ferreiro afirmou que o Goberno do PP confirmou, en resposta ás preguntas do grupo nacionalista, que este ano non se celebrará o Lugo Máxico, unha das programacións que, segundo o BNG, tiña maior éxito dentro do calendario cultural anual do Concello. Ferreiro sinalou que o PP, cando estaba na oposición, «sempre tiña peticións para esta actividade e sempre criticaba a pouca calidade da proposta que realizaba o BNG», polo que considera que agora «non sexa capaz de organizar este festival xa consolidado na programación da cidade».

A edil explicou que o BNG solicitara información para coñecer en que estado se atopaba a organización do Lugo Máxico 2026. Ferreiro lembrou que nos últimos anos a cidade contaba cunha axenda cultural anunciada con antelación, algo que, ao seu xuízo, facilitaba a participación da veciñanza, do turismo e dos diferentes colectivos implicados.

O Lugo Máxico, segundo destacou a concelleira, converteu cada ano Lugo nun punto de encontro para a maxia, coa participación de magos recoñecidos de Galicia, do resto do Estado e doutros lugares do mundo. A programación incluía diferentes propostas, entre elas galas, actividades nos centros de ensino e sesións solidarias no HULA.

As críticas do BNG estendéronse tamén á situación económica do Concello. Tras a Comisión Municipal de Contas, o portavoz do grupo, Rubén Arroxo, denunciou «a falta de transparencia» do Goberno do PP e asegurou que o executivo municipal non respondeu ás preguntas formuladas sobre o pagamento das 542 facturas pendentes nin explicou como pretende afrontar o orzamento de 2027.

Segundo Arroxo, estas facturas corresponden a autónomos e pequenos empresarios e, nalgúns casos, levan catro meses co trámite administrativo rematado, pero continúan pendentes de pasar polo pleno para poder efectuar o pagamento. O portavoz nacionalista afirmou que, se finalmente se inclúen na sesión plenaria do vindeiro 27 de outubro, os pagos poderían demorarse ata ese mes, o que suporía «un retraso de cinco meses desde que os expedientes administrativos están rematados».

O BNG sostén que estas facturas xa poderían ter sido incluídas nos plenos dos meses de maio, xuño e xullo, ao estar finalizados os trámites administrativos. Arroxo atribuíu esta situación a unha decisión do Goberno municipal e afirmou que «o goberno segue a castigar aos autónomos e pequenos empresarios desta cidade».

Na Comisión de Contas tamén se abordou a elaboración dos orzamentos municipais para 2027. Arroxo sinalou que os anuncios realizados pola alcaldesa, Elena Candia, implican un incremento do gasto corrente, especialmente nos capítulos 1 e 2, correspondentes, entre outras cuestións, ao persoal e aos gastos en bens correntes e servizos.

O BNG calcula que o incremento que deberá asumir o Concello será de preto de seis millóns de euros. Segundo os seus cálculos, o capítulo 2 debería incrementarse en aproximadamente catro millóns de euros, mentres que o capítulo 1 aumentaría nuns dous millóns.

Arroxo explicou que entre as cuestións que poden elevar o gasto do capítulo 2 están a renovación de contratos municipais con actualización de prezos, os incrementos xa anunciados nalgúns contratos e o aumento do custo da enerxía. O portavoz do BNG advertiu de que, segundo a súa análise, o incremento do gasto terá que ser compensado mediante maiores ingresos municipais ou mediante reducións noutras partidas.

Neste sentido, Arroxo criticou que o Goberno local non aclarase se prevé incrementar os impostos ou reducir as subvencións destinadas ás entidades deportivas, veciñais e culturais ou aos servizos sociais para facer fronte ao aumento dos capítulos 1 e 2. O portavoz do BNG considerou que a falta de respostas nas comisións evidencia, ao seu xuízo, «a improvisación do goberno do PP e a súa falta de transparencia».