O BNG anima á veciñanza de Lugo a participar na manifestación do Día da Patria Galega en Compostela
O BNG de Lugo presentou a campaña do Día da Patria Galega, que este ano se celebra baixo o lema "Somos unha nación, soberanía e dereitos nun mundo en paz", e fixo un chamamento á cidadanía para participar na manifestación nacional convocada para o vindeiro 25 de xullo en Santiago de Compostela.
A deputada do BNG no Parlamento de Galicia, Montse Valcárcel, destacou que esta xornada constitúe o principal acto reivindicativo do nacionalismo galego e unha cita na que, cada ano, milleiros de persoas se reúnen para reclamar unha Galicia con maior capacidade de decisión, máis dereitos e un futuro definido desde o propio país.
Segundo explicou, a mobilización partirá ás 12.00 horas desde a Alameda de Compostela, nun percorrido que volverá poñer o foco na defensa da soberanía galega, dos dereitos sociais, da lingua, da cultura e da paz.
Valcárcel asegurou que o Día da Patria Galega representa unha oportunidade para expresar o orgullo de pertenza a Galicia e reafirmar o compromiso coa defensa da identidade e coa capacidade do país para decidir o seu futuro.
A parlamentaria tamén convidou á veciñanza lucense a sumarse á convocatoria e informou de que o BNG habilitará un autobús con saída ás 9.30 horas desde Lugo para facilitar o desprazamento ata Santiago. As persoas interesadas poderán reservar praza contactando co local comarcal da organización.
A campaña concluirá o próximo 25 de xullo coa manifestación nacional, unha cita na que o BNG espera reunir a milleiros de persoas chegadas de distintos puntos de Galicia.