O BNG convoca unha concentración en Doiras para reclamar a reapertura do consultorio médico
O Bloque Nacionalista Galego chama á veciñanza de Doiras e do conxunto do municipio de Cervantes a participar nunha concentración este mércores 22 de abril ás 12:00 horas diante do consultorio médico da localidade. O obxectivo da protesta é denunciar o que a formación cualifica como “mentiras reiteradas do Partido Popular” en relación coa reapertura deste servizo e coa situación sanitaria no centro de saúde de San Román.
Desde o BNG acusan ao PP de anunciar en varias ocasións a posta en marcha do consultorio de Doiras sen que esta se fixese efectiva, ao tempo que alertan da precariedade que, segundo indican, continúa afectando ao centro de saúde de San Román, especialmente pola falta de cobertura estable da praza médica.
A responsábel local da formación en Cervantes, Maruxa Bardasco, criticou a xestión sanitaria na zona e asegurou que o PP leva tempo realizando anuncios que non se materializan, deixando sen servizos básicos a unha poboación que xa afronta dificultades derivadas da dispersión xeográfica e das condicións do territorio.
Na mesma liña, a deputada do BNG no Parlamento galego, Olalla Rodil, advertiu dunha estratexia de deterioro da atención primaria no rural. Segundo sinalou, o compromiso de reabrir o consultorio de Doiras non se cumpriu e tampouco se garante unha cobertura adecuada nin da atención médica nin da enfermaría en San Román.
A formación nacionalista esixe á Xunta a reapertura inmediata do consultorio e a cobertura estable de todas as prazas sanitarias no concello, defendendo que o acceso á sanidade pública é un dereito fundamental. Ademais, anima á cidadanía a participar na mobilización como ferramenta para reivindicar servizos esenciais e frear o que consideran un abandono continuado da sanidade na montaña lucense.