O BNG critica a falta de melloras nos servizos ferroviarios de Lugo
O portavoz do BNG en Lugo, Rubén Arroxo, criticou ao Ministerio de Transportes pola situación dos servizos ferroviarios da cidade, que considera "cada vez de peor calidade".
As declaracións producíronse tras a resposta do Ministerio ás preguntas presentadas pola senadora do BNG, Carme Da Silva, sobre a situación das conexións ferroviarias.
Arroxo subliñou que o ferrocarril debe ser un servizo público que vertebre o territorio e atenda ás necesidades reais das veciñas e veciños de Lugo, e reclamou reforzar as conexións de madrugadores entre Ourense e Lugo para facilitar viaxes útiles non só a Madrid, senón tamén dentro da propia comunidade.
O Ministerio alegou que as conexións de Lugo con Madrid manteñen os mesmos horarios que en 2000 e que se facilitou o acceso á alta velocidade, unha resposta que Arroxo cualificou de insuficiente.
Recordou que gran parte da vía ferroviaria actual é a mesma que existía no século XIX e fixo balance dos avances logrados polo BNG desde 2020, como a modernización do tramo Ourense-Monforte-Lugo ou o estudo de viabilidade da conexión de Lugo con Santiago de Compostela.
Arroxo tamén advertiu que, a pesar de certas obras de mellora, non se están recuperando os servizos retirados e incluso se anunciou que algúns poderían eliminarse.
Subliñou que as infraestruturas deben ir acompañadas dunha mellora efectiva dos servizos, e reafirmou o compromiso do BNG de seguir loitando para que Lugo non quede illada e conte con conexións ferroviarias dignas, lembrando as campañas históricas da formación a favor do tren na cidade.