O BNG de Lugo cuestiona os cambios nos horarios dos obradoiros infantís do Mercado Municipal
A concelleira do BNG Cristina López levará á próxima comisión de Mercados o novo funcionamento dos obradoiros infantís que se celebran os sábados pola mañá no Mercado Municipal de Lugo. A formación cuestiona os cambios introducidos polo Goberno do PP e quere coñecer os motivos da modificación, así como as consecuencias que pode ter para as familias usuarias.
López lembrou que esta actividade, posta en marcha polo BNG durante a súa etapa á fronte da área de Participación, leva anos ofrecendo alternativas de lecer para os nenos e nenas mentres as familias realizan as súas compras. A iniciativa tamén busca atraer público á Praza de Abastos e ao Mercado Municipal, contribuíndo a dinamizar estes espazos comerciais.
A edil destacou que os obradoiros cumpren unha dobre función: por unha banda, permiten que os máis pequenos participen en actividades durante as mañás dos sábados e, pola outra, ofrecen ás familias unha ferramenta para organizar as compras e conciliar.
Porén, a comezos de novembro o Executivo local anunciou unha nova distribución dos horarios, que establece dúas quendas: unha de 11.00 a 12.30 horas e outra de 12.30 a 14.00 horas. Este sistema substitúe o horario continuado de 11.00 a 14.00 horas que se viña aplicando ata agora.
Para Cristina López, o cambio resta marxe de flexibilidade ás familias, que xa non poderían utilizar o servizo en calquera momento dentro da franxa horaria, como sucedía anteriormente. A concelleira considera que esta limitación pode afectar especialmente a aquelas persoas que non teñan facilidade para axustarse con precisión aos horarios establecidos.
Ademais de preguntar polas razóns que levaron a modificar a organización, o BNG quere saber se será posible incorporarse aos obradoiros unha vez iniciada cada quenda. A formación considera que esta cuestión é importante para determinar se o novo sistema permitirá manter a utilidade do servizo para o conxunto das familias.
Os nacionalistas reclaman ao Goberno municipal que explique os criterios da decisión e avalíe o seu efecto tanto na participación como nas necesidades de conciliación. López defende que os obradoiros deben conservar o seu carácter de recurso "accesible, flexible e útil para as familias".