O BNG de Lugo pide permitir bandeiras galegas nas bancadas de todos os estadios de fútbol
O BNG de Lugo presentou un escrito ante a Subdelegación do Goberno para solicitar que se aplique o mesmo criterio sobre a exhibición de bandeiras galegas nas bancadas de todos os estadios de fútbol. A iniciativa chega tras o acontecido no encontro entre o CD Lugo e o RC Deportivo Fabril, disputado o pasado 17 de outubro no Anxo Carro.
A formación nacionalista considera necesario garantir unha aplicación igualitaria da normativa e defende que a presenza da bandeira galega nas bancadas non debe ser motivo de sanción. O BNG sostén que a exhibición pacífica destes símbolos non pode interpretarse como unha incitación á violencia.
Para apoiar a súa petición, a organización fai referencia á sentenza do caso da estelada, que anulou a orde que pretendía prohibir a exhibición deste símbolo. O BNG considera que este precedente debe terse en conta para evitar actuacións que, ao seu xuízo, supoñan un trato discriminatorio ou arbitrario cara ás bandeiras galegas.
A formación reclama así respecto polos símbolos nacionais de Galicia e polo dereito das persoas afeccionadas a expresar libremente as súas ideas nas bancadas, sen discriminacións nin diferenzas de criterio entre estadios.