O BNG reclama saber se Lugo Máxico se celebrará este ano ante a falta de información
A falta de información sobre a edición de 2026 do Lugo Máxico levou ao BNG a pedir explicacións ao Goberno municipal. A formación nacionalista quere coñecer se a programación se celebrará este ano, en que datas terá lugar e que actividades están previstas.
A edil do BNG Maite Ferreiro sinala que, a finais de agosto, aínda non hai información pública sobre unha cita que nos últimos anos se converteu nun dos eventos culturais máis destacados do calendario da cidade.
O BNG considera que o atraso no anuncio da programación dificulta a participación da veciñanza e tamén a planificación dos diferentes colectivos e visitantes interesados na actividade. Ferreiro lembra que nas edicións anteriores Lugo Máxico contaba cunha programación anunciada con antelación.
A iniciativa converte cada ano a cidade nun punto de encontro para afeccionados á maxia, coa presenza de ilusionistas e magos recoñecidos procedentes de Galicia, doutras comunidades e doutros países. O programa incluíu en anteriores edicións diferentes propostas, como galas de maxia, actividades nos centros educativos e sesións de carácter solidario no HULA.
O BNG quere agora coñecer cal é o estado de tramitación da edición de 2026 e se o Concello mantén a intención de celebrar o evento. A formación tamén reclama información sobre as posibles datas, o contido da programación e as actividades que se desenvolverían nesta nova edición.
Ferreiro critica ademais o cambio de posición do PP respecto desta programación e lembra que, cando estaba na oposición, reclamaba ao Goberno municipal a celebración e potenciación do Lugo Máxico.
A formación nacionalista considera necesario aclarar canto antes o futuro da edición deste ano, especialmente tendo en conta que agosto está a piques de rematar e que o evento require coordinación entre organización, participantes e espazos que acollen as diferentes actividades.