O Campus de Lugo recibe o novo alumnado cunha programación de actividades ata o 27 de setembro
O Campus de Lugo da Universidade de Santiago de Compostela prepara a chegada do novo curso cunha programación especial de benvida que se desenvolverá entre o 14 e o 27 de setembro. A proposta reúne actividades culturais, deportivas, formativas e de lecer pensadas para facilitar que o alumnado coñeza os servizos universitarios, as instalacións e tamén a propia cidade.
A programación comezará o luns 14 de setembro cun encontro na Residencia Bal y Gay, a partir das 21.00 horas, no que se dará a coñecer parte dos servizos da USC ao alumnado residente.
O mércores 16 será unha das xornadas con maior variedade de propostas. O Centro de Linguas Modernas ofrecerá aulas abertas de alemán, francés e inglés en dúas quendas, de 12.00 a 13.00 e de 18.00 a 19.00 horas. Pola tarde tamén se instalarán, entre as 18.30 e as 21.30 horas, diferentes postos informativos dos servizos da Universidade.
A música terá tamén un papel destacado esa xornada. A explanada da cafetería da Escola Politécnica Superior de Enxeñaría contará ás 20.15 horas coa actuación de Alddara e ás 21.15 horas coa de LG1DO. Previamente, ás 18.30 horas, terá lugar un encontro cos dous artistas. O acceso será libre ata completar a capacidade do espazo.
As actividades continuarán o xoves 17 con dúas rutas destinadas a descubrir tanto o patrimonio como o contorno natural de Lugo. Pola mañá, de 10.00 a 14.00 horas, desenvolverase "Lugo amurallado: 2000 anos de historia viva", con saída do Museo Domus do Mitreo. Pola tarde, de 16.00 a 20.00 horas, será a quenda de "Entre augas e sendeiros: descuberta da contorna natural de Lugo", que partirá da Facultade de Veterinaria.
O luns 21 estará dedicado a coñecer recursos e actividades da propia Universidade. Ás 11.30 horas terá lugar "BUSCa: iníciate" na Biblioteca Intercentros do Campus de Lugo. Xa pola tarde-noite, entre as 20.00 e as 22.00 horas, a Aula de Teatro e Danza da Facultade de Veterinaria organizará un encontro aberto para presentar o seu funcionamento mediante unha sesión práctica.
O deporte e as artes escénicas concentrarán boa parte da programación do martes 22. Entre as 9.00 e as 14.00 horas celebrarase o Campionato de Benvida no Campus, con competicións de fútbol 7, baloncesto, voleibol e fútbol sala no Complexo Polideportivo O Pombal e A Cheda.
Durante a tarde sucederanse diferentes propostas na Aula de Teatro e Danza da Facultade de Veterinaria, con aulas abertas de danza ioga, danza creativa para maiores e danza contemporánea. A xornada tamén contará con Trivigal, ás 18.00 horas, na cafetería da Facultade de Veterinaria.
O mércores 23 chegará unha nova combinación de formación e música. A Escola Universitaria de Enfermaría acollerá de 10.00 a 13.00 horas o obradoiro Quérote+. Pola tarde, ás 18.00 horas, haberá un taller de pandeireta na explanada da cafetería da EPSE, antes dunha foliada aberta que se celebrará entre as 20.00 e as 23.00 horas coa participación de Volta do Agro, Axeigo e Cántigas e Frores.
A programación do xoves 24 incluirá tamén actividades informativas, culturais e escénicas. Quérote+ instalará unha mesa informativa na Facultade de Veterinaria de 11.00 a 14.00 horas. Ademais, haberá visitas guiadas á Domus do Mitreo ás 11.00 e ás 17.00 horas. Ás 13.00 horas, o Servizo de Mobilidade ofrecerá información no Edificio Cactus.
A xornada pecharase cunha nova actividade da Aula de Teatro e Danza. Ás 17.00 horas desenvolverase unha aula aberta de taller de voz e movemento na Facultade de Veterinaria.
Con esta programación, o Campus de Lugo aposta por ofrecer ao alumnado diferentes formas de coñecer a Universidade e integrarse na vida universitaria desde os primeiros días, combinando información sobre os servizos da USC con actividades culturais, deportivas e de lecer.