O Campus Terra financiará proxectos de investigación con potencial de transferencia á sociedade
O Campus Terra da Universidade de Santiago de Compostela puxo en marcha unha nova edición do seu Programa de Activación á Transferencia, unha iniciativa destinada a impulsar proxectos de investigación que se atopen nunha fase inicial de desenvolvemento e que precisen avanzar cara a estadios de maior madurez tecnolóxica.
A convocatoria está dirixida ao persoal investigador e aos grupos de investigación vinculados ao Campus Terra que traballen nalgunha das súas áreas estratéxicas e que dispoñan de resultados con posibilidades reais de aplicación práctica e transferencia ao tecido social e económico.
O programa conta cun orzamento total de 30.000 euros, cos que se financiarán ata tres proxectos cun máximo de 10.000 euros cada un. Os fondos permitirán desenvolver accións de validación técnica, probas de concepto ou procesos de escalado que faciliten a chegada das investigacións a fases máis avanzadas.
As iniciativas deberán estar relacionadas con ámbitos como a agricultura sostible, a saúde e produción animal, a alimentación segura e saudable, a xestión forestal e o cambio climático, a biodiversidade ou o desenvolvemento socioeconómico do medio rural.
As solicitudes poderán presentarse ata o vindeiro 11 de setembro a través da sede electrónica da USC. Un comité integrado por profesionais e especialistas procedentes de empresas e institucións vinculadas aos sectores de coñecemento do Campus Terra será o encargado de avaliar as propostas.
Ademais do apoio económico, as persoas participantes recibirán asesoramento técnico especializado por parte do Campus Terra e da Área de Valorización, Transferencia e Emprendemento da USC, que tamén colaborará no seguimento dos proxectos seleccionados e na procura de oportunidades para facilitar a súa aplicación práctica e a súa chegada ao mercado ou á sociedade.