O canteirán Pablo Rubal continuará no CD Lugo por dúas tempadas máis no primeiro equipo

O Club Deportivo Lugo e Pablo Rubal veñen de acordar a renovación do contrato do futbolista mariñán por dúas tempadas adicionais, segundo confirmou a entidade albivermella.
O canteirán, natural de Burela e nado en 2004, manterase así vinculado ao club no que deu os seus primeiros pasos como xogador, continuando en dinámica do primeiro equipo.
Rubal foi superando etapas dentro da estrutura do CD Lugo ata consolidar a súa progresión na pasada campaña, na que se converteu nun habitual nos adestramentos do primeiro equipo desde o inicio do curso.
O seu debut oficial produciuse na terceira xornada de liga, participando na vitoria por 0-1 fronte ao Sestao River en Las Llanas. Ao longo da tempada, o xogador disputou un total de nove encontros entre todas as competicións.
Con esta renovación, Pablo Rubal reafirma o seu compromiso co CD Lugo e continúa medrando como futbolista no club que o viu formarse, dando pasos firmes no seu desenvolvemento profesional dentro do fútbol albivermello.