O CB Breogán reforza a dirección de xogo coa fichaxe de Rasir Bolton
O CB Breogán anunciou a incorporación do base estadounidense Rasir Zias Bolton para a tempada 2026/2027. O xogador, nacido en Petersburg (Virxinia) o 27 de setembro de 1999, completa a posición de director de xogo do equipo celeste de cara ao novo curso.
Bolton formouse no baloncesto universitario dos Estados Unidos, onde defendeu as camisetas de Penn State, Iowa State e Gonzaga antes de iniciar a súa carreira profesional en Europa no ano 2023.
A súa primeira experiencia no continente europeo foi nas filas do Telenet Giants, de Bélxica, onde asinou unha destacada campaña ao converterse no segundo máximo anotador da liga. Durante esa tempada rexistrou unhas medias de 17,8 puntos, 2,9 asistencias e 3,2 rebotes por encontro, ademais dun 37,2 % de acerto desde a liña de tres puntos.
Na campaña 2024/2025 incorporouse ao Spartak Office Shoes de Serbia, equipo no que coincidiu co exbreoganista Momirov. Nese curso disputou 28 partidos, nos que promediou 13,4 puntos, 2,2 rebotes e 3 asistencias por encontro, cunha porcentaxe do 34,5 % en lanzamentos triplos. Ademais, contribuíu a que o seu equipo alcanzase as finais da ABA Liga.
Durante a pasada tempada, a 2025/2026, militou no GeVi Napoli da Lega Basket Serie A italiana, onde continuou coa súa progresión e mellorou as súas prestacións, asinando unhas medias de 13,9 puntos, 3,4 rebotes e 4,2 asistencias por partido.
Con 1,90 metros de estatura, o novo xogador do Río Breogán destaca pola súa capacidade anotadora e pola súa visión de xogo, cualidades que lle permiten combinar a dirección do equipo cunha notable facilidade para asistir aos seus compañeiros. O club tamén salienta o seu físico, que lle achega solidez defensiva e presenza no rebote, ademais de considerar que aínda conta cun importante potencial de crecemento no baloncesto europeo.