O CD Biosbardo destaca no Campionato de España de trail e suma novos éxitos en distintas probas
O CD Biosbardo tomou parte no Campionato de España de trail por federacións, disputado en Oviedo, cun percorrido esixente no monte Naranco como escenario principal.
Nesta cita, Carla Trillo converteuse na segunda mellor corredora absoluta da Selección Galega tras completar unha carreira ben administrada, contribuíndo a que o combinado autonómico acadase o seu mellor resultado histórico cun noveno posto na clasificación xeral.
A atleta do club enfrontouse ás mellores especialistas do panorama estatal nun trazado rápido e técnico, no que logrou un meritorio posto 32 na clasificación absoluta.
Por outra banda, a entidade tamén informou da baixa de Tamara García, que permanecerá arredor de seis meses afastada da competición ao ter que someterse a unha intervención no xeonllo dereito. A deportista perderase así os campionatos de clubs e outras citas clave da tempada, recibindo o apoio tanto do club como dos seus patrocinadores durante o proceso de recuperación.
No ámbito competitivo, o CD Biosbardo tamén celebrou novos éxitos noutras probas. En Ponferrada, Kenia Estrada proclamouse campioa absoluta do Trail Pajariel, unha das citas máis recoñecidas do Bierzo e do noroeste peninsular, caracterizada pola súa dureza, cun percorrido de 30 quilómetros e un desnivel acumulado de 2.000 metros de ascenso.
Ademais, en Toques, Verónica Neira, da localidade de Cruces, acadou a vitoria na categoría Máster 2 na tradicional Subida a San Cidre, unha proba de 17 quilómetros marcada por unha ascensión continua.