O CD Lugo abre as inscricións para unha nova edición do CDLUCAMP de verán
O Club Deportivo Lugo puxo en marcha unha nova edición do seu campus de verán, o CDLUCAMP, unha iniciativa lúdico-deportiva que emprega o fútbol como ferramenta para promover a actividade física, os hábitos de vida saudables e a convivencia entre os máis novos. A actividade conta co patrocinio principal de Cabreiroá e desenvolverase do luns 31 de agosto ao venres 4 de setembro no campo de fútbol das Gándaras.
O campus está destinado a nenos e nenas nados entre os anos 2011 e 2020, ambos incluídos, sen importar a súa experiencia previa ou nivel futbolístico. A través da metodoloxía de formación do CD Lugo, os adestradores do club traballarán aspectos técnicos, tácticos e físicos mediante exercicios similares aos que se empregan nas categorías de base da entidade albivermella.
Co obxectivo de ofrecer unha atención máis personalizada, as sesións desenvolveranse en grupos reducidos, cun máximo de entre 10 e 12 participantes por adestrador. Desde o club destacan que o campus está pensado tanto para quen desexa iniciarse no fútbol como para aqueles que xa practican este deporte e queren perfeccionar as súas habilidades nun ambiente formativo e divertido.
As actividades desenvolveranse diariamente entre as 9.30 e as 13.30 horas. Cada xornada comezará coa recepción dos participantes, continuará con dous bloques de adestramento separados por un descanso para a merenda e concluirá cun período dedicado á competición.
O CDLUCAMP ofrece un total de 45 prazas e o prazo de inscrición permanecerá aberto ata o 16 de agosto. A cota xeral é de 160 euros, aínda que o segundo irmán contará cun prezo reducido de 145 euros e os abonados do CD Lugo poderán participar por 140 euros.
Todos os asistentes recibirán unha equipación oficial do campus, un diploma acreditativo, unha valoración técnica individual e distintos agasallos relacionados co Club Deportivo Lugo.